The World Needs To Be Saved......How ?

                                        The World Needs To Be Saved .......How ?

                                              By :  Tsurtidogni
                                                        040509
                                                        Sunday
Through My Cebuano Poetry:

Pahiunang Bahin:

Lumalabay lamang ako niining kalibutan. Sa akong pagpuyo ug paghigugma sa mga binuhat ni Bathala ako usab
kaniya nagpasalamat sa daghang mga grasyang nadawat. Kon ang Mahal nga Bathala nagasulti, "Lakaw ug
pagsangyaw! " Sa akong huna-huna, tungod kay ako mahilig ug may dakong gugma sa pagsulat, mao nga kini
ang akong nahibaluan nga pamaagi aron sa pagpahibalo sa anaa sa akong dughan nga sa Gamhanang
Bathala kanako nagatug-an.
Poydi nga ako mahanaw na ning kalibutan sa mga buhi tungod kay kitang tanan matapos man, pero maoy
akong dakong pangandoy nga ang kalibutan magpabilin sa iyang pag-irog, matag gutlo, matag takna, matag
adlaw, matag semana, matag  buwan ug matag tuig, nga ang mga molupyo sa umaabot nga mga panahon
adunay kalinaw ug pagminahalay ug labaw sa tanan adunay katagbawan ug katumanan sa ilang mga pangandoy,
ug sila magahuyhuy para sa kalambuan ug kaayuhan sa tanan !


Ang Kalibutan Kinahanglan Nga Maluwas....Unsaun man ?


1
Sa pagpanglabay sa daghang panahon
Balikon ta ang kagahapon
Ang kagahapon nga dili na mahimong karon
Igo lamang nato nga pagahandumon.

2
Kaniadto sa bata pa ang kalibutan
Gamay pa ang mga katawhan
Pero ang mga pagkaun sobra ka daghan
O pagkabulahan !

3
Ang mga kabalayan puno sa katanuman
Maanindot nga mga kabulakan
Pagahilantawan uban ang mga pahiyom
Sama sa kaputi sa balas sa baybayon.

4
Ning-agi na ang duha ka mangilngig nga giyera
Daghan kaayo kining mga nabiktima
Ang mga tawo dako ang pag-antos kaniadto
Sama sa naglagiting  kainit sa dakong udto.

5
Ang tanan nga mga nangagi may leksyon nga naani
Ato kining pagahinuktukan, kinahanglan kini
Aron matan-aw ang angay buhaton
Ug aron magmatngon ug usab  magmaamguhun.

6
Giyera didto, giyera dinhi kini nakapapas
Sa daghang mga butang ug mga lawas
Hinaut pa nga ang tanan magsinabtanay
Sa problema maghuy-huyay,  magsultihanay.

7
Ang kagahapon nga puno sa kalipay
Kini makahumpay ug magpabilin kanunay
Sila maoy atong batonan ug pagpanglantaw
Para ang maayong ugma atong mabugtaw

8
Ang karon pagka dakong estorya
Ang kalibutan pirti  nausab na
Daghan ang mga nakitang kalainan
Sa tanan nga  lugar o kanasuran.

9
Ang akong mensahe sa Amerika
Sa ilang Presidente nga si Obama
Ikaw gipili sa Labaw nga Gamhanan
Aron ang nasud kanunay mabulahan.

10
Dako ang problema nga imong sagubangon
Kini imo gayod nga pagahunahunaun
Ayaw paghimo ug disisyon sa pagdinali-dali
Pangayo ug tambag sa imong  mga pinili.

11
Kon ang yuta mag-atubang ug pagpanghulga
Ayaw kakuyaw ug ayaw usab kabalaka
Lig-una ang imong mga kahigalaan
Ug ipatrabaho ang mga kaumahan.

12
Daghan pang yuta angayan nga  mapuslan
Kini gihatag sa kinaiyahan
Patamni aron walay magutman
Para ang tanan mabusug ang tiyan.

13
Palihuka ang mga katawhan
Nga sa kanunay gihatagan
Kon sila aduna pay kusug para manlimbasug
Ayaw kini tagai pirmi ug lawug.

14
Dili ba ang mga hiyas nga pulong nagsulti
Ang mga tawo sa isda ayaw sila paghatagi
Hinuon hatagi sila ug mga pamaagi
Aron sila may panginabuhi ug magkugi.

15
Ang tinuod sila nagkinahanglan ug puhunan
Para makalihok ug makasugod sa mga kinahanglan
Suportahi sila aron maimportante
Ug ang  mga kinabuhi adunay  mga silbi.

16
Pabaruga nga lig-on ang siyensya
Sa pag-imbento sa mga medisina
Aron paghumpay sa mga balatian
Sa kalakin-an ug sa kababayen-an.

17
Ayaw pasagdahi ang mga kabataan
Nga maghitak bulingon sa kadalanan
Hipusa lakip ang mga ginikanan
Badlunga sa walay paglangan.

18
Kon adunay mga buang nga maglibud-libud
Silang tanan patambali gayud
Ibutang sa limpyo nga mga hospital
Ipaatiman sa tumang pagmahal.

19
Daghang  manglimbasug aron ikaw mabuntug
Pero silang  tanan dili makadaug
Ipadayon ang imong mga plano
Nga sa katawhan makaayo.

20
Ang mga eskuylahan pabantayi
Walay pusil dad-on ang mga estudyante
Kinahanglan gayud nga masusi
Kay kini dakong kapilde.

21
Sa natad sa panggubatan
Ang imong nasod tinuod nga gamhanan
Pero mas maayo sa tanan
Kon walay gubat nga matilawan.

22
Ang dangoyngoy sa mga inahan
Ang pangagho sa mga amahan
Igo na aron matapos ang mga pag-antos
Sa gubat nga walay pulos.

23
Kini dili nagpasabot nga ihunong ang pag-atiman
Sa daghan nga mga kasundaluhan
Tungod kay sila gikinahanglan
Sa umaabot nga mga katalagman.

24
Katalagman sa kahanginan
Katalagman sa kadagatan
Katalagman sa kadalanan
Katalagman sa kapanahunan.

25
Ang mga sundalo maoy molihok
Sa pag-atiman sa matag suok
Aron dali nga mahuptan
Ang pagsulbad sa suliran.

26
Para sa atong mga kabatan-onan
Sa tibuok kalibutan
Hununga na kanang druga
Nga sa lawas makaluya.

27
Ang mga tawo nga mabangis
Sa druga naghimo ug bisnis
Kini magbutang kaninyo
Sa kalayo sa impyerno.

28
Hunong na kamo, intawon
Ayaw na kini ug ipadayon
Karon dayon hunong na
Mentras may panahon pa.

29
Pagbag-o sa kinabuhi nga tim-os
Sa panginabuhi nga anaay pulos
Aron wala nay mga luha nga moagas
Sa daghang kasakit nga gipaawas.

30
Sa akong mahal nga Pilipinas
Kini karon akong ipagawas
Ang dako kung mga panglantaw
Sa umaabot nga mga adlaw.

31
Sa pagkakaron dili pa ulahi ang tanan
Aduna pay daghan nga kahigayonan
Nga ang tanang Pinoy magmalambuon
Nga ang tanan magmalipayon.

32
Kining mahugaw nga politika
Kini usab ihunong na
Magsugod kita sa sinugdanan
Sa tinuod ug kamatuoran.

33
Wagtangon ang pagdinumtanay
Para ang kalambuan masapnay
Atimanon ang edukasyon
Ang bayranan dili mahalon.

34
Ang mga kadagatan limpyohan
Ang mga umahan pagatam-nan
Ang mga sweldo patas-an
Dili kay ang mga dato ra mauy mabulahan.

35
Para sa mga simbahan
Sa tibuok kalibutan
Tabangi ninyo ang mga tinuod nga pobre
Dili kay pulo lamang mga sulti.

36
Kamong mga terorista hunonga usab ninyo
Ang pagkidnap diri, kidnap dito
Walay kaayohan nga mahatag
Kon dili ang kapait ra sa ugma damlag.

37
Mga mahal kong katawhan nahinumdum ka ba ?
Sa mga propeta nga akong gipadala
Dinha si Noah pero  ang uban wala nila paminawa
Si Nostradamus usa usab siya !

38
Karon mao ang panahon nga inyong paminawon
Ang mga pulong nga pagasulaton unta basahon
Basahon ug pagasabton sa tuman nga pagsabot
Para ang tanan malikay sa dakung kagubot.

39
Ang mga ginikanan sa tanan nga kanasuran
Sabta ninyo ang inyong mga kabataan
Kamong tanan nga mga kabataan
Tahora ug mahala ang mga katigulangan.

40
Samtang ang adlaw mosidlak pa sa silanganan
Ug kini magpadayon pagsalop sa kasadpan
Samtang may mga lunhaw pa nga kadahonan
Ampingi ug mahala ang atong kinaiyahan.

41
Samtang maaninag ang pagpidlok sa mga bituon
Samtang and bulan kanunay nagmadanihon
Ang kalibutan magpadayon sa pagtuyok
Paminaw kamo ayaw kahadlok.

42
Daghan ang nagpakita sa kawanangan
Wala pa gayod bisag usa nga nailhan
Moabot ra ang tukmang kahigayonan
Nga sila motugpa sa landinganan.

43
Ayaw kamo kahikurat ug ayaw among-amongi
Ang mga banyaga ayaw pasipad-i
Igo lamang silang makighagala ug makigsabot
Sa mga katawhan unya makalipay ug makapahimuot.

44
Sila mobisita lamang sa makadiyot
Aron sila makigsandurot
Alang sa kaayohan sa tanan
Ug para sa dakong kalamposan.

45
Sila igo lamang sa pagsenyas
Paminawa sa walay pakyas
Ang ilang dakong laraw
Mao ra ang paglantaw.

46
Unya sila mobalik sa makadaghan
Tungod kay sila nailhan
Ilang ihatag ang dakong kahayag
Sa mga masakiton ipadayag.

47
Tagai sila ug luna sa Africa
Tagai sila ug luna sa Tsina
Tagai sila ug luna sa Europa
Tagai sila ug luna sa Asya.

48
Aduna na silay luna sa Amerika
Walay tawo ug butang nga sakiton nila
Anaa na sila karon nanagpundo ug nag-estudyo
Alang sa kaayohan sa tanan kaninyo.

49
Diin sila gikan ? Inyo ra nga unya nga masabtan
Kon usa kamo ka pinalangga sa Dakong Gamhanan
Kining tanan ug tanan kong gipangsulat
Sa kamatuoran sa ugma  ibatbat.

50
Dakong hangyo sa mga mapahitas-on
Kamo unta magmapaubsanon
Aron ninyo makab-ot nga hugot
Ang kalipay nga dili pug-ot.


51
Ang tanan maghinigala-ay
Wala na ang mga away-away
Para ang mga plano molampus
Dili dad-on sa alimpulos.

52
Ang sakit sa kalimot ug walay panimuot
Makaplagan ra ang medisina, tanan magsandurot
Anaa sa garden ni Naomi ang tunok kuhaa
Sabila, pabukala, usa ka tasa imna adlaw-adlawa.

53
Paimna ang tanan labi na ang kabataan
Para ang ilang utok mahatagan
Sa sustansya nga gikinahanglan
Buhata ayaw paglangan.

54
Daghan pa ang mga imbento
Sa atong mga siyentipiko
Daghan pa nga mga kaayuhan
Sa tanan matagamtaman.

55
Ang dalan mahayag ug halapad
Bisan asa ikaw ipadpad
Sa imong pagpanimpalad
Ayaw kalimot sa paghalad.

56
Paghalad sa mga pag-ampo ug pangaliya
Pagpasalamat sa tanan nga mga grasya
Itudlo sa tanan nga kabataan sa kalibutan
Ipadayon hangtod sa kahangturan.

57
Paminawa ang kinahanglan paminawon
Basaha ang kinahanglan basahon
Sabta ang kinahanglan pagasabton
Isulti sa mga makina-admanon.

58
Ayaw kamo kalisang ug ayaw katarantar
Sa tanang mga pulong nga akong giprisentar
Kining tanan alang lamang sa pagluwas sa kalibutan
Nga unya pagapuy-an sa inyong mga kapamilyahan.

59
Maanindot ang plano sa Mahal nga Gamhanan
Para sa umaabot nga mga katuigan
Posible nga dili na nako matilawan
Pero dako ang pasalamat sa akong dughan.

60
Likaye ang daghan nga mga bisyo
Pag-inom, pagsugal, panigarilyo
Ihunong na usab ang mga kahigal
Kay ang AIDS wala gayoy ikatambal.

61
Limpyohi ang matag nataran
Sa mga utanon kini pagatamnan
Sa panahon sa inyong pag-ani
Usa kini sa inyong mga swerti.

62
Ang tubig magpadayon sa pag-agos
Para mainom sa tanan sa walay pag-antos
Pero ayaw kini ninyo pag-usik-usiki
Kay matag tulo niini importante.

63
Ang ulan sa tanang kagabhion
Kini usab poydi nga gamiton
Maoy makapadagan sa mga sakyanan
Kini ang labing hawod nga madiskobrehan.

64
Walay modaug-daug ug walay magpadaug
Ang tawo walay angay nga ikapanghambog
Kay ang tanan sa katapusan mahimong abog
Bisan unsa pa ka nindot sa inyong barug !


65
Daghan nga mga taytayan ang matukod
Para ang mga nasud magkasuod
Dili kinahanglan and usa ka paril o bungbog
Nga sa panaghiusa makasampong.

66
Magpabilin nga adunay dato ug adunay pobre
Kay kon ang tanan dato kinsa pa man ang mosilbi?
Kinsa pa usab ang motrabaho para adunay maani?
Dili nagpasabot ikaw pobre walay silbi !

67
Kon ang imong bulsa lamang ang pobre
Pero ang imong utok daghang pamaagi
Ikaw magpuyo nga mabusganon
Walay gutom bisan sa kawad-on.

68
Ayaw kamo kabalaka niining maong sitwasyon
Kay ang tanang problema aduna may sulosyon
Ayaw gayud paghunos o paghunusi ang kinabuhi
Dawata ang tanan sa dakong kaputli.

69
Adunay usa ka Inahan nga Labaw nga Bulahan
Kini sa kalisod ug mga kasakit inyo nga matawgan
Siya ang labing tim-os ug tiunay, motabang kanunay
Maria, Mahal nga Birhen, mahadlok ang mga panulay.

70
Tinuod nga adunay mga anghel sa langit
Ania sila sa yuta aron ipaambit
Ang akong mga pagbantay ug pagproteksyon
Ang ilang mga misyon nagpadayon, makanunayon.

71
Higala mahala ang imong mga kontra
Sa ilang mga sala sila pasayloa
Lisod sabton, pero buhata
Para mabubo ang daghang grasya.

72
Ang tubig sa dagat magpadayon ang kaparat
Ang tubig sa mamala sa kalami walay sipyat
Ayaw pagpasipad-i, ayaw paghugaw-hugawi
Para magpadayon ang mga gamit niini.

73
Sa Aysa usa ka nasud nga sayop ang baroganan
Magtuman sa iyang gusto para masamok ang tanan
Gamay lamang kini pero kinahanglan sumpoon
Para ang dautang tuyo dili magmalampuson.

74
Adunay silot nga mapaabot nga sakit palandongon
Kini mahitabo para makat-on ug leksyon
Mobomerang matod pa sa kaniadto
Makarma ug magsakripisyo.

75
Lumalabay lamang nga mga problema
Makaamgo, maghinulsol, ulahi na ba?
Dili ! Makabarog pa o  makatindog
Sa sunod dili na manghambog.

76
Adunay  prutas nga makaluwas
Kanser sa totoy mapapas
Ania kini sa Pilipinas
Atis sa katam-is walay pagkupas.

77
Ang sakit nga leukemia
Ang tambal pirting mahala
Kaon kamo sa dahon sa kamote
Laga-a lamang walay daghang arte.


78
Higupa ang iyang makolor nga sabaw
Sasakit kini makatunaw
Daghan kini sa kaumahan
I-apod-apod, ipatanom sa tanan.

79
Ang dahon sa kamunggay nailhan na
Pero sa tibuok kalibutan wala pa
Tambal kini sa sakit nga ulcer
Makaayo usab kini sa utok nga gikanser.

80
Ako si Tsurtidogni sa akong pagsulat niini
Sa mga adlaw ug sa mga gabii
Ang akong mga luha moagas
Ang akong mga pasalamat malibkas.

81
Wala ako masayod ug ngano
Ako nagmata wala magdamgo
Usa lamang ako ka instrumento
Usa ka ordinaryo nga tawo.

82
Daghan pa nga mga pulong ang akong pagasulaton
Daghan pa nga mga isyu ang akong pagabatbaton
Moabot pa kini sa usa ka dakong libro
Kay ang tanan isaysay ko kaninyo.

83
Didto sa  mga bukid nga nagabarog
Adunay mga tawo nga pirming nagkurug
Adunay pagkaun nga mabungahon lanahon
Ihaplas, para ang takig dili magpadayon.

84
Molambo pagbalik ang ekonomiya
Ang paglaum ayaw pagwad-a
Kini mahitabo kon ang tanan magkahiusa
Magdaginot, dili mag-usik-usik sa kwarta.

85
Unsa man ang pag-usik ?
Kini karon akong itagik
Ang mga tawo dili kinahanglan magkombira
Para kaunon lang sa makausa.

86
Kon ikaw walay daghang kantidad
Ngano nga ikaw magpa-abilidad
Mangutang para lang makakaun ug manag-inom
Ang sobra usahay sa basurahan magtigom.


87
Pamahaw, paniudto, panihapon
Husto na, ayaw na pagsinobra
Poydi isakripisyo ang meryenda
Para sa ugma may magasto pa.

88
Sa panahon sa kadaghan
Magtigom para sa tingulan
Sa panahon sa kalisod
Praktikal ang ipasunod.

89
Sa mga espesyal nga okasyon
Sama sa kasal ug mga selebrasyon
Poydi daghan ang lutuon
Pero ayaw usiki, sa tanan ipakaun.

90
Adunay kustomre nga angay hunongon
Sa pamilya nga nibisita si kamatayon
Ayaw na intawon sa pag-andam ug pagkaun
Para sa mga bisita ug sa tanan nga tapukon.

91
Igo na nga ang mga pamilya mapasalamaton
Sa ilang mga pagkonsolar sa luhang matulo-on
Dili na kini angay palutoon ug pasirbihon
Kay ang kasakit sobra na nga bation.

92
Ang mga lasang o kakahoyan
Kini dili pagasilaban
Ang tawo nga mobuhat sa ingon
Magbasul ug dili magmalinawon

93
Pagtanom sa mga kahoy dugangan
Para dili maglunop kon moulan
Ang mga kanal limpyuhan
Para ang tubig makadagan.

94
Ang pagtoo sa tawo imprtante kaayo
Kinahanglan muila kamo nga adunay Ginoo
Siya angay nga mahalon dili kahadlukan
Tahuron aron paglipay sa iyang dughan.

95
Kon adunay magmagahi sa pagtahod magmakuli
Tambagi sa makadaghan isubli-subli
Pasabta sa hinay-hinay nga pamaagi
Dili sa kulata ug ang sakit nga pulong ayaw isulti.


96
Sa mga tawo nga kulang ang pagtoo
Magpakita ako ug dakong milagro
Nganha sa kalangitan manag-awit
Ang mga angel nga kaninyo nahilambigit.


97
Paminawa ninyo ang ilang mga sonata
Kay kini puno lamang sa gugma
Ang mga tuno niini makalipay
Sa mga kasakit makahumpay.


98
Moabot kini sa usa ka siglo
Si Tsurtidogni wala na kaninyo
Siya kauban sa mga anghel nga mokanta
Ang tanan tawga, patan-awa, papaminawa !


99
Usa kini ka oras sa sayong kabuntagon
Ang mga nangatulog inyong pagapukawon
Ang inyong palibot mahumot nga walay sama
Mas humot pa sa mga rosas nga puno sa gugma.


100
Sa panahon sa inyong pag-inusara
Hinumdumi ninyo siya
Kay siya igo lamang sa pagbuhat
Sa akong tuyo para isulat.


101
Kining tanan adunay katumanan
Manghatag ako ug handumanan
Si Maria magsabwag ug mga bulak
Gikan sa langit, ang tanan mamakpak.


102
Hipusa kini ninyo ug hatagi ang tanan
Sa mga altar kini idayan-dayan
Sa kanunay mahumot ang palibot
Sa tanan kini ipasimhot.


103
Sa tanan makab-ot ang kinabuhi nga malinawon
Matilawan ang kalipay nga matinuoron
Kon ang kasingkasing mo mapasayloon
Kon ang kalag mapahiubsanon.


104
Higala sa imong pagpaminaw sa sonata
Sa mga nota sa kanta sa Papa ni Mirna
Dinhi imong mahiamgohan
Nga ang mapaubsanon mabulahan.


105
Ang mga pangulo sa tanang kalihokan
Sa labing gamay ug dako nga kanasuran
Maghatag ug maayo nga ehemplo
Mahimong sumbanan sa tanang mga tawo.


106
Matod pa ni Gwen ang lider nga gwapa
Ang imong mga lihok mauy pasultiha
Kini usa ka dakong panig-ingnan
Sa usa ka lider nga kugihan.


106
Kon adunay manaway kanimo
Ayaw una paglagot hunahunaa pag-ayo
Basin diay kon ang pagsaway adunay punto
Ayaw paglinuog kay ikaw tawo nga may prinsipyo.


107
Poydi nga imong kayugot hikalimti
Paghimo lamang ug mga pamaagi
Ipadayon ang katarong ug kaligdong
Mahigmata ra sila unya mamalandong.


108
Kon ang tawo mangayo kanimo ug pasaylo
Kon ang pasaylo nahatag na kini sa maong tawo
Kalimti ug ayaw na paghisguti pag-usab
Para walay laing kayo nga midilaab.


109
Ang kinabuhi nga puno sa mga pag-antos
Ayaw gayud kini ug ikahiubos
Dawata ang tanan ug paningkamot
Ang ganti imo ra unya nga makab-ot.


110.
Higugmaa ang imong kaugalingon
Pun-a kini sa mga maayo nga kabubut-on
Ang tanan mahapsay ug ang dalan haruhay
Matagamtam mo ang dakong kalipay.


111
Ang tawo nga sulondon dili mahambogon
Sayon ikauban dili masinahon
Siya dali nga mahalon ug higugmaon
Ang iyang buhat ug pulong matinud-anon.

112
Ang buhat nga sulondon ayaw pakganga
Ang mga tawo ayaw pagpuoha
Kay kinsa pa ang mopuyo ning kalibutan
Kon ang ganghaan sa pagpanganak pugngan.

113
Dili nagpasabot nga mawala ang imong hunahuna
Kinahanglan usab ang maayong pagbana-bana
Kon imong panginabuhi makasarang sa pag-atiman
Himuoa usab nga ang ilang mga ugma mabulahan.

114
Kini imong ipangutana sa imong kaugalingon
Ang akong pamilya ako ba nga mapakaun ?
Ang ilang lawas aduna bay suoton ?
Labaw sa tanan mahatag ko ba ang edukasyon ?


115
Magpadayon and pangutana ug tubaga
Ako ba nga mahatag kanila ang usa ka balay
Nga puno sa gugma ug pagtinahuray
Kon OO. ..ipadayon ang plano ipatunhay.

116
Dinhi makita-an mo ang pagpanglantaw
Sa umaabot nga mga adlaw
Sa pagsugod pagpamilya
Nga ang tanan magamaya.


117
Dili kinahanglan manganak ug daghan
Kon sila mag-antos sa kaulahian
Pero kon hugton ang imong pagpaningkamot
Poydi ikaw ang magbuot..


118
Kon sa pananhon sa mga kalisod
Ayaw pagkaguol bisan ikaw naumod
Adunay kamot moagak kaninyo
Matuman ra ang mga damgo.

119
Ayaw kaligutgot, ayaw pagsapot-sapot
Kay kini sa kinabuhi walay kahumot
Ipadayon ang mga pahiyom ug mga talidhay
Para ang tanan nga buhaton sayon kanunay.

120
Ang mga bulak sa mga kayutaan
Ihatag kini ug idayan-dayan
Pero ayaw ihatag sa walay kinabuhi
Dili  na makit-an ug masimhot ang bahandi.


121
Ang tubig, ang kahanginan
Ang halapag nga kalawuran
Ang mga kahayupan ang mga katawhan
Pagamahalon ug paga-ampingan.

122
Magtinabangay, magsandurutay
Magminahalay, makig-angay-angay
Para ang tanan sa kalubutan
Magpadayon sa kahangtoran.

123
Ang matag tuyok sa petsa sa adlaw
Makahatag ug paghanduraw
Sa matag gutlo nga umaabot
Ayaw paharia ang kapungot.


124
Maglagut, magkaligutgut
Ang tanan makapanghimaraut
Kining tanan wagtanga sa imong buot
Para ang kinabuhi makapahimuot.


125
Ipadayon ang pagpanaw
Sa matag gabii ug adlaw
Ipalanug ang mga katawa
Kay ang kinabuhi kausa ra.


126
Sa imong mga pahiyum
Mahanaw and mga dag-om
Mahayag ang kalangitan
Maghatag ug kalamposan.

127
Kamong tanan mangutana
Giunsa ko pagtalik ang mga letra?
Ang tubag ko kaninyo, Usa ra !
Kini tungod sa dakong "Gugma".

128
Gugma para sa tibuok kalibutan
Gugma para sa tanang katawhan
Gugma sa tanang kayutaan
Para sa kabulahanan sa tanan.


129
Pamatia gayod ang gugma sa kanunay
Dawata ug hangopa sa dakong kalipay
Kini ang rason para ang tanan motunghay
Sa dakong kalamboan modagayday.

130
Kang kinsa ihatag ang mga bulak nga mahomot
Ihatag kini sa mga buhi aron masimhot
Ayaw kini ug igasa sa wala nay kinabuhi
Kay dili maaninaw ang tanang bahandi.


131
Bahandi sa bulak nga madanihon
Kini angay gayod nga madinayganon
Sama sa mga pulong ayaw pugngi
Ipaabot sa maong tawo and tuyo niini.

132
Ayaw isulti nga "Gihigugma Ko Ikaw"
Sa patay nga tawo dili na makapaminaw
Isulti kini karon samtang may kinabuhi pa
Aron ang gugma makapalipay, makapakatawa.

133
Ang mga pulong nga hinan-ay ug manggiluy-on
Sa balos kini usab kaluy-on
Ang mga pulong mahait, makasakit
Sa dughan makahilak, magping-it.

134
Makahibalo ka ba nga mopasalamat
Sa tanan nga mga grasya nga nadawat
Ang mga problema usab pasalamati
Kay kini aduna usab dakong silbi.

135
Moabot ang insaktong panahon
Ang mga relihiyon magkauyon
Adunay dakong panagtigum
Sa tanan magmasinabtanon.

136
Mawala na ang mga pagduda
Matubag na ang tanan nga pangutana
Mahatag ang tinuod nga gugma
Kauban ang daghan nga mga grasya.








To be continued....