Sommer 'n Gedig

A poem about feelings of loss, emptiness and anxiety at the loss of a loved one

Waar is jy?

Ek soek jou in elke hoek en uitgetrapte paadjie

waar ons eens ontmoet, bevriend en vertroud geraak het



Jou reuk bly talm en elke skadu dra jou vorm

soos dit dans op die maat

van ‘n vlikkerende vlam

oorbekend en dringend roep dit na my vanuit

wit gepleisterde mure

genadeloos in hul verwyt.



Stadig drup die gedagte aan jou

uit moeg-vergete lende.



Smagtend...



terwyl elke greintjie van my wese jou

naam uitskree

soos die klank van duisend kwetterende swaeltjies

Shhh... fluister ek. Die bure sal kla.



Ek is bang

Bang vir die genadelose stilte

soos wanneer dit ophou reën.

Bang vir dit wat lankal vergeet is

soos die nadraai van ‘n onbedekte seën.